BSGG Hytaý koronawirusyny häzirlikçe «halkara derejeli adatdan daşary ýagdaý» diýlip ykrar etmedi

Bütindünýä Saglygy Goraýyş guramasy Hytaýda koronawirusyň öň ýüze çykarylmadyk görnüşi sebäpli dörän pnewmaniýa keseliniň ýaýramagyny halkara derejeli adatdan daşary ýagdaý diýip yglan etmekden häzirlikçe saklanýar.
BSGG-niň baş direktory Tedros Adhanom Geýbreýesusyň aýtmagyna görä, bu häzir Hytaý üçin adatdan daşary ýagdaý. Heniz ol global derejeli adatdan daşary ýagdaý derejesine geçenok. Şol bir wagtda Hytaý hökümeti 25-nji adamyň aradan çykandygyny habar berdi. Ol Hytaýyň Russiýa bilen serhetleşýän Heýlunszýan welaýatynda aradan çykdy, diýip Interfaks habar berýär.
Henize çenli mälim bolmadyk 2019-nCoV koronawirusy bilen kesellänleriň sany 800 adamdan geçdi. Kesellänleriň içinde esasan — Hytaýyň ýaşaýjylary bar, şeýle hem bu kesel Tailandda, Ýaponiýada, Günorta Koreýada, ABŞ-da, Gonkongda, Singapurda, Taýwanda, Makaoda, Wýetnamda, Saud Arabystanynda ýüze çykaryldy.
BSGG dünýä saglygy goraýyş ulgamynda adatdan daşary ýagdaýy bäş gezek yglan etdi: 2009-njy ýylda doňuz dümewi we poliomielit zerarly; 2016-njy ýylda Zikiň ýokanjy zerarly; 2014-nji we 2019-njy ýyllarda Günbatar Afrikada we Kongo Demokratik Respublikasynda Ebola keseli zerarly.
Hytaýyň saglygy goraýyş boýunça milli komissiýasy ýokanjyň adamdan adama geçip bilýändigini tassyklady.