Türkmenistanda awtomobil jerimelerini onlaýn tölemäge mümkinçilik berýän mobil programma işe girizildi. Bu resmi serwis Içeri işler ministrliginiň Polisiýanyň ýol gözegçiligi gullugynyň işgärleri tarapyndan bellenilýän jerimeleri plastik bank kartlarynyň üsti bilen tölemek üçin döredildi, diýip Orient habar berýär.
Awtosürüjiler üçin bu hyzmatyň esasy artykmaçlyklary — maglumatlary gözlemegiň ýönekeý usulyny hödürleýändiginden we öz jerimäňi öýüňden (ýa-da awtoulagyňdan) düşmän tölemek mümkinçiliginiň bardygyndan ybaratdyr.
Ilki bilen, degişli formany doldurmaly, ol ýerde kararyň belgisini, ulag serişdesiniň hasaba alyş belgisini, jogapkärçilige çekilen şahsyň adyny we familiýasyny, mobil telefonynyň belgisini, şeýle hem bellenilen jerimäniň möçberini görkezmeli. Soňra töleg sahypasyna geçmeli hem-de bank kartyň rekwizitlerini görkezmeli.
Töleg amala aşyrylan badyna görkezilen mobil telefon belgä jerimäniň tölegini edilendigi barada SMS habarnama geler.
Kart maglumatlarynyň ogurlanmak howpy ýokdur. Çünki, töleg geçen badyna öňki girizlen şahsy maglumatlaryň ählisi awtomatik ýagdaýda ýok ediler.
Ýatlap geçsek, 2018-nji ýylda Türkmenistanda eýýäm jerimeleri tölemegiň ýeňilleşdirilen usuly işe girizilipdi. Şonda ýol gözegçilik gulluklarynyň işgärlerine elektron terminallar berildi.
«P.Ý.G.G.» mobil programmany şu salgydan ýükläp alyp bilersiňiz.
Türkmenistanda awtomobil jerimeleriniň onlaýn-tölegi ýola goýuldy
- 25.01.2020 14:35
- 18k+
