Mercedes-Benz we Bosch Kaliforniýa köçelerinde sürüjisiz ulaglaryny işe girizdiler

Mercedes-Benz we Bosch San-Hosede sürüjisiz taksileriň zakazy boýunça ilkinji taslamasyny işe girizdi.
Awtomatlaşdyrylan şäher dolanyşygyny ösdürmek boýunça Mercedes-Benz-iň Bosch bilen bilelikdäki taslamasy täze bir döwre başlady: San-Hosede (Kaliforniýa) sürüjisiz ulaglarda gezelenç etmek islegi boýunça ilkinji hyzmatlar hereket edip başlady. Ilkibaşda bu hyzmatdan Daimler Mobility AG tarapyndan işlenilip düzülen programma arkaly S-Class awtomobilinde gezelenç etmegi bronirlemek bilen ulanyjylaryň çäkli topary peýdalanyp biler.
Başlangyç taslamanyň kömegi bilen Mercedes-Benz we Bosch SAE şkalasy boýunça 4-nji we 5-nji derejeli awtonom dolandyrylyş sistemasynyň geljekki ösüşi we olary seriýaly önümçilige taýýarlamak üçin zerur bolan informasiýalary almaklygy göz öňünde tutýar. Şeýle tejribe hyzmatdaşlara sürüjisiz gurluşlaryň jemgyýetçilik transportuny we karşeringi öz içine alýan intermodal mobillik sistemasyna birigip bilýändigine düşünmäge mümkinçilik berer.
«Bu öz häsiýetini görkezmeli ýönekeý bir awtomatlaşdyrylan transport serişdesi däl. Bize olaryň şäher mobilliginiň çözülmesi kyn bolan meselesiniň bir böleginiň bolup biljekdigi baradaky subutnama gerek» - diýip, Mercedes-Benz awtonom dolandyrylyş bölüminiň ýolbaşçysy Uwe Keller belleýär.
2017-nji ýylyň ortalarynda San-Hose hususy kompaniýalary awtonom transport serişdelerini barlagdan geçirmeklige we ýol hereketinde güýçlenýän meseleleri seljermäge çagyran ABŞ-nyň ilkinji şäheri bolupdy. Mercedes-Benz we Bosch taslamasy “akylly şäher”, howpsuzlygy ýokarlandyrmak we ýollarda dyknyşygy azaltmak, şeýle-de “mobilligi has elýeterli, durnukly we inklýuziw etmek” programmasynyň durmuşa geçirilmeginiň bir bölegi bolmaly.