Mandarinleriň peýdasy we zyýany: dietologyň maslahatlary

Mandarin möwsüminiň başlanmagy bilen, dietologlar bu miwe barada öz maslahatlaryny  paýlaşdylar. “Вечерняя Москва” neşiri esasan wirus keselleriniň köp ýaýran möwsümi bolan güýz we gyş pasyllarynda mandariniň peýdasy barada habar berýär.
Dietologlaryň aýtmagyna görä, mandarinde witaminleriň örän köp mukdary, mikro we makroelementler, antioksidantlar saklanýar. Şeýle-de, olar griboklaryň ösmegini peseldýän, bakteriýalary öldürýän, artyk holesterinleri çykaryp, iýmit siňdiriş organlaryna oňaýly täsir edýän iýmit woloknalaryny saklaýarlar. 
Mandariniň düzüminde nemli bardalaryň dikelmegi üçin zerur bolan beta-karotin hem bar, ol näçe köp boldugyça, şonça-da mandariniň reňki açyk bolýar.
Mandarinler immun ulgamlary we ýürek üçin peýdaly – olarda ýürek myşsasyny berkidýän we artykmaç suwuklyklary aýyrýan kaliý köp. Mandariniň dilimini örtýän ak gabyjaklarynda antioksidant saklanýar.
Ýöne hemmeler üçin mandarin deň peýdaly däl. Aşgazan we içege, gastrit, ýokary turşulyk kesellerinde mandarinleri kabul etmekde seresap bolmaly. Aç garnyňa mandarini iýmeli däl, gabyklaryny demlemegi gowy görýänler bolsa bu miweleriň, esasan hem, import edilenleriň köplenç griboga garşy serişdeler bilen gowulaşdyrylýandygyny ýatda saklamaly. Eger-de miwe ýiti ýalpyldaýan bolsa, onuň gabygyny demlemek bolmaýar.
Şeýle-de, mandarinlerden miwe suwuny taýýarlaman, miwäni bitewiligine iýseň has gowy – şonda dilimlerde saklanýan şeker kletçatkalary glýukozanyň derejesini ýokarlandyrmazlar, aşgazanasty mäzlere täsir ýetirmezler.
Günüň dowamynda ortaça 2-3 mandarini iýmek howpsuz. Şondan artyk iýmek ukyby adamyň saglyk ýagdaýyna we günüň dowamynda näçeräk şekeri kabul edýändigine bagly bolýar.