Ýylyň iň meşhur söz düzümi belli edildi

Iňlis diliniň düşündirişli sözlügini çykarýan Harper Collins neşirýaty “climate strike” (“klimatik iş taşlaýyş”) aňlatmasyny 2019-ny ýylyň söz düzümi diýip atlandyrdy. Bu barada Trendiň TASS-a salgylanmak bilen habar bermegine görä, Press Association agentligi habar berdi.
Agentligiň maglumatlaryna görä, Harper Collins neşirýatynyň ekspertleri bu aňlatmanyň ulanylyşyny Parižde klimatyň üýtgemegi bilen bagly Bütindünýä konferensiýa geçirilende, ýagny 2015-nji ýylda ilkinji gezek hasaba alyp başlaýarlar.
Düýp sebäbi bolsa dünýäde meşhurlyga eýe bolan Global Climate Strike aksiýasy boldy, onuň ýüzi bolup 16 ýaşly şwed ekoaktiwisti Greta Tunberg çykyş etdi. 2018-ni ýylda ol klimatyň üýtgemegi ugrundaky göreş üçin her anna güni şwed mejlisiniň binasynyň öňünde ýeke özi sakçylyk geçirmek arkaly mekdep iş taşlaýşyny başlaýar. Köp ýurtlaryň talyplarydyr okuwçylary onuň göreldesine eýerýärler, şu ýylda bolsa aksiýa has giň gerime eýe boldy. Italiýada sentýabryň ahyrynda ekologiki garşylyga 1 mln töweregi adam gatnaşdy – esasan hem, mekdep okuwçylary we talyplary.
Sözlüge “rewilding” (“rewaýlding”) ýa-da sözme-söz terjime edilende “gaýtadan ýabanylaşdyrmak” düşünjesi hem girizilýär. Tebigaty goramak boýunça bu konsepsiýa iri haýwanlary öň olaryň adamlar tarapyndan gyrlyp ýok edilen ýerine dolamak arkaly ekosistemany dikeltmegiň esasynda döredilýär. Mundan başga-da, Collins Dictionary sözlüginiň resmi neşirine şeýle sözler hem giriziler, influencer (“inflýuenser”, pikiri kesgitli auditoriýa üçin ähmiýetli bolan adam), hopepunk (“houp-pank” – optimizm we pozitiw çagyryşlary döretmeklige gönükdirilen telewizion žanry, deepfake (“dipfeýk” – emeli intellektiň esasynda döredilen şekilleriň sintez usuly), non-binary (“nebinarnyý” – özüni erkek hökmünde-de, aýal hölmünde-de görmezligi dogry hasaplaýan neýtral genderli adamlara degişli bolan).
2018-nji ýylda Harper Collins-iň derňew geçirijileri single-use (“bir gezeklik peýdalanma”) aňlatmasyny ýylyň sözi diýip atlandyrdylar, 2017-nji ýylda bolsa – täzelik habary görnüşinde ýaýraýan, ýalan, köplenç sensasion maglumatlar hökmünde kesgitlenilýän “feýkow täzelikleri” (fake news) aňlatmasy. 2016-njy ýylda Birleşen Korollykda Ýewrosoýuz bilen aýrylyşmak baradaky referendum geçirilende söz düzümi Brexit iň belli aňlatma boldy, ol “Beýik Britaniýanyň Ýewrosoýuzdan çykmagy” diýen manyny aňladýar.