Türkmenistanyň Prezidenti noýabryň başynda Italiýa resmi saparyny amala aşyrar

Türkmenistanyň Prezidentiniň Italiýa Respublikasyna boljak resmi saparynyň çäklerinde Milan şäherinde 6-njy noýabrda işewürler maslahaty geçiriler. Hökümet mejlisinde Ministrler Kabinetiniň Başlygynyň orunbasary Ç.Gylyjow bu çärelere görülýän taýýarlyk barada habar berdi. Işewür duşuşygyň çäklerinde ýurdumyzda öndürilýän önümleriň sergisini guramak göz öňünde tutulýar.
Forumyň işine Italiýanyň Täjirçilik ministrliginiň Söwda boýunça agentliginiň ýolbaşçysynyň, Lombardiýa welaýatynyň prezidentiniň orunbasarynyň hem-de energetika, nebitgaz, himiýa, azyk hem-de dokma senagaty, gurluşyk we gurluşyk materiallary, oba hojalyk, maşyngurluşyk, ulag we logistika ulgamlarynda iş alyp barýan, önümçilik pudaklary üçin ýokary tehnologiýaly enjamlary hem-de oba hojalyk tehnikasyny öndürýän kompaniýalaryň wekilleriniň gatnaşmagyna garaşylýar.
Garaşylyşy ýaly, maslahata italýan kompaniýalarynyň 100-den gowragy gatnaşar, Türkmenistandan bu çärä ykdysadyýetiň eksport ugurly pudaklarynyň wekilleri, Senagatçylar we telekeçiler birleşmesiniň agzalary gatnaşarlar.
Şeýle hem forumyň çäklerinde ikitaraplaýyn duşuşyklar guralar hem-de işewür gepleşikleriň netijeleri boýunça hyzmatdaşlyk hakyndaky, şol sanda telekeçilik ugry boýunça resminamalara gol çekilmegi göz öňünde tutulýar.