Awtomobilleriň spidometrleri sürüjileri näme üçin aldaýar

Awtomobiller boýunça neşiriň bilermenleri ähli awtoulaglaryň spidometrleriniň nädogry tizlik görkezmeginiň sebäbini anykladylar. Alnan netijä görä, tizlik babatda bu nädogry görkeziji öndüriji kompaniýalar tarapyndan ýörite goýberilýär. Bu barada Rambler habar berýär.
Bilermenleriň aýtmagyna görä, awtomobil tizlik görkezijileriniň (spidometrleriň) ählisi döwlet standartlaryna we BMG-niň Ýewropa ykdysady komissiýasynyň talaplaryna laýyk gelmeli. Döwlet standartlary spidometrleriň görkezijileriniň ýokarlandyrylmagyna ýol berýär we olaryň aşakladylmagyny düýbünden gadagan edýär. Bu hukuk beýanatynyň awtorlary beýle etmek bilen sürüjileriň we olaryň ýolagçylarynyň howpsuzlygyny gorap saklamaklygy maksat edinendiklerini tassyklaýarlar.
Awtomobil öndüriji kompaniýalaryň nygtamagyna görä, spidometrleriň görkezijilerinde elmydama az-owlak köpeldip aýtmak bar. Bu şol sanda awtomobiliň tehniki aýratynlyklary üçin hem bolup biler. Hususan-da, spidometr transmissiýanyň walyndan maglumat alýar. Walyň tizligi bolsa, tekerleriň aýlanma tizligine gönüden-göni gatnaşykdadyr. Bilermenleriň bellemegine görä, görkezijilerdäki nädogrulyk şinalardaky pes ýa-da ýokary basyşy, motorlaryň we geçiriji koropkalaryň gurluşynyň aratapawudyny nazara alýar.
Şol bir wagtda bilermenleriň nygtamagyna görä, spidometr awtomobil belli bir tizlige ýetenden soň artdyryp görkezip başlaýar. Mysal üçin, 60 km/sag tizlikde spidometr dogry tizligi görkezer, 110 km/sag-da bolsa, aratapawut 10 km/sag töweregi bolup biler.