«Kasperskiýniň» täze önümi oýun wagtynda aldawçylygy ýüze çykarmaga mümkinçilik berýär

«Kasperskiýniň Laboratoriýasy» kibersportda täze ugra gadam basdy. Kompaniýa «Kaspersky Anti-Cheat» programmasyny hödürledi. Bu programma kibersport ýaryşlaryny gurnaýjylara we onlaýn-oýunlary döredijilere çiterlik (aldawçylyk, kod ulanmaklyk) bilen göreşmeklerine ýardam eder, diýip Trend agentligi kompaniýa salgylanyp habar berýär.
Bulut tehnologiýalarynyň esasynda işlenip düzülen täze programma dowam edýän wagtyň özünde oýnuň barşynda ýol berlen aldawçylygy kesgitlemäge, şeýle hem ýaryşyň eminlerine çiterlikde ýüze çykarylan ýagdaýlar barada awtomatik ýagdaýda habarnama ugratmaga kömek edýär. Täze tapyndynyň prezentasiýasy «The StarLadder Berlin Major 2019» kibersport ýaryşynda boldy.
Geýmerler köplenç ýagdaýda oýun wagtynda garşydaşlarynyň çit-kodlaryny ulanyp kezzaplyk edýändigine gabat gelýärler. Mysal üçin, Irdeto kompaniýasynyň geçen ýyl geçiren barlagynyň görkezişi ýaly, geýmerleriň diňe 12%-i onlaýn oýunlaryň dowamynda garşydaşlary tarapyndan çit kodlaryň ulanylyp artykmaçlyk gazanylan ýagdaýyna duş gelmändiklerini bellediler, her üçünji geýmer bolsa özüniň çiterlik edýändigini boýun aldy. Bu hili ýagdaýda düzgünleriň bozulmagy professional oýunçylaryň ýaryşlardan daşlaşmagyna getirýär, ol ýaryşlaryň, oňa gatnaşyjylaryň abraýyna şek ýetirýär, oňa gatnaşyjylaryň sanynyň azalmagyna getirýär. «Kasperskiýniň» täze programmasy bu howplary azaldýar.
«Kaspersky Anti-Cheat» API-niň üsti bilen islendik kibersport platforma ýeňil ornaşdyrylýar. Ýaryş başlamazdan öň programma her bir gatnaşyjynyň kompýuterine goýulýar. Oýun başlan badyna Kaspersky Anti-Cheat onda bolup geçýän ähli hadysalar hakynda maglumat toplap başlaýar we şübhe döredýän maglumatlary seljermek üçin bulut tehnologiýasyna iberýär. Öz gezeginde, ýaryşyň emini şol wagtyň özünde web-interfeýs hasabatlaryň üsti bilen aldawçylygy anyklap bilýär. Şeýlelikde, Kaspersky Anti-Cheat oýnuň dowamynda kod ulanylandygyny tehniki taýdan subut edip berýär, şol bir wagtda hem oýun prosesine asla hiç hili täsir etmän, soňky çözgüdi eminiň garamagyna goýýar.
Galyberse-de, «Kasperskiýniň» täze önümi oýun prosesine asla täsir etmän, trafige hem agram salmaýar.