«КамАЗ» Türkmenistana 2000 sany ýük awtoulagyny getirer

Ýük awtoulagyny öndüriji «КамАЗ» kompaniýasy 3 ýylyň içinde Türkmenistana dürli modifikasiýaly 2000 sany awtoulag tehnikalaryny getirer. Bu barada sng.today «КамАЗ-yň» metbugat merkezine salgylanyp habar berýär.
Habarda bellenilmegine görä, şolardan 800-den gowrak awtomobil eýýäm şu ýylyň ahyryna çenli Türkmenistana getiriler.
Mundan başga-da, kompaniýa Türkmenistanyň dürli ýerlerinde «КамАЗ-yň» 4 sany okuw-hyzmat merkezini açmagy meýilleşdirýär. Bu merkezler 2008-nji ýyldan bäri ýurdumyzda hereket edip gelýär.
Ýatlap geçsek, Türkmenistan Russiýanyň öňdebaryjy ýük maşyngurluşyk kompaniýasynyň iri hem durnukly satyn alyjysy bolup durýar. 2008-2018-nji ýyllar aralygynda Türkmenistana «КамАЗ-yň» awtomobilleriniň we ýöriteleşdirilen tehnikalarynyň 9000-den gowragy satyn alyndy. Bu ýük awtoulaglary we tehnikalar ýerli ykdysadyýetiň dürli pudaklarynda giňden peýdalanylýar.
Bu kysymly ýük awtoulaglaryna bolan ýokary islegi nazara alyp, 2008-nji ýylyň iýulynda Aşgabatda «КамАЗ-yň» okuw-hyzmat merkezi açyldy. Awtotehnikalaryny getirip bermek we oňa doly derejede tehniki hyzmaty, şol sanda diagnostikany we düýpli abatlaýşy geçirmek bilen bir hatarda merkezde türkmen hünärmenlerini taýýarlamaklyk gurnaldy.
Türkmenistanda «КамАЗ» dilerlik tory döredildi, ol Aşgabatda, Balkanabatda, Maryda we Türkmenabatda hereket edýär.