Düzümine Ýewropanyň iri media agentliklerini birleşdirýän «Euronews-NBC» halkara ýaýlyma beriş korporasiýasy «Awazada» geçiriljek I Hazar ykdysady forumyny şöhlelendirer. Bu barada Aşgabatda «Arçabil» myhmanhanasynda I Hazar ykdysady forumyna bagyşlanylyp daşary ýurtlaryň habar beriş serişdeleri üçin geçirilen media forumda bu korporasiýanyň halkara söwda bölüminiň direktory Kýel Şteýn habar berdi, diýip ORIENT habar berýär.
«Euronews-NBC-yň» wekili şeýle belläp geçdi: «Hazar ykdysady forumy iri möçberli çäre bolar. Biz bu çäräni ýaýlymda şöhlelendirmek bilen meşgullanýarys. Her günde «Euronews-a» dünýä boýunça 35 million adam tomaşa edýär. Şonuň üçin hem ol bu halkara forumy üçin örän ýerine düşen meýdançadyr».
— Bu forumyň köp sanly adamlara Türkmenistan bilen, onuň taryhy, medeniýeti, dürli ugurlarda ýeten sepgitleri bilen has ýakyndan tanyş bolmaga ýardam etjekdigine ynanýaryn. Ýewropanyň ilaty Hazar sebiti, Türkmenistan barada has içgin tanyş bolmaga isleg bildirýärler. Şonuň üçin hem Türkmenistanyň hökümeti, guramaçylar bilen hyzmatdaşlygymyzyň öz miwelerini berjekdigine ynanýaryn – diýip Şteýn belledi.
«Euronews-NBC» Türkmenistanda yzygiderli geçirilýän iri halkara çärelerini şöhlelendirmek meselesinde mundan beýläk hem Türkmenistan bilen hyzmatdaşlyk etmäge umyt edýär. Şeýle hem Şteýniň bellemegine görä, kompaniýa yzygiderli ýagdaýda nobat boýunça hazarýaka döwletleriniň her birinde geçirilmegi meýilleşdirilýän soňky Hazar ykdysady forumlaryny hem şöhlelendirmäge taýýardyr.
Euronews I Hazar ykdysady forumynyň çärelerini şöhlelendirer
- 30.06.2019 12:49
- 3.1k+