Türkmenistan «KAMAZ» ýük awtoulaglarynyň 2000 sanysyny satyn alar

21-nji iýunda sanly wideoaragatnaşyk arkaly geçirilen Ministrler Kabinetiniň mejlisinde wise-premýer M.Çakyýew ýurdumyzyň edara-kärhanalarynyň öňünde goýlan jogapkärli wezipeleri üstünlikli durmuşa geçirmek we olaryň maddy-enjamlaýyn üpjünçiligini has-da gowulandyrmak hem-de önümçiligiň netijeliligini ýokarlandyrmak maksady bilen, «KAMAZ» kysymly awtoulaglary, ýörite tehnikalary we ätiýaçlyk şaýlaryny satyn almak boýunça alnyp barylýan işler barada hasabat berdi. Bu ugurda şeýle ulaglaryň 2000-e golaýy satyn alnar.
Türkmenistanyň Prezidentiniň gol çeken Kararyna laýyklykda, ministrliklere, pudaklaýyn dolandyryş edaralaryna, beýleki edara-kärhanalara «KAMAZ» kysymly awtoulaglaryň, ýörite tehnikalaryň uly toplumyny we ätiýaçlyk şaýlaryny tapgyrlaýyn satyn almak barada «KAMAZ FTC CORP.LLP» kompaniýasy (Beýik Britaniýanyň we Demirgazyk Irlandiýanyň Birleşen Patyşalygy) bilen şertnamalary baglaşmaga ygtyýar berildi.
Şeýle hem Türkmenistanyň Prezidentiniň ýakynda Russiýa Federasiýasynyň Tatarystan Respublikasyna iş saparynyň çäklerinde «Kamaz» kysymly awtoulag tehnikalaryny getirmek we olara geljekde hyzmat etmek babatda hyzmatdaşlyk etmek hakynda Türkmenistanyň Senagat we kommunikasiýa ministrliginiň «Türkmenawtoulaglary» Agentligi bilen «Kamaz» jemagat paýdarlar jemgyýetiniň arasynda Ylalaşyga gol çekildi.
Türkmenistan «KAMAZ» kärhanasynyň önümlerini satyn alýan iri döwletleriň biri bolup durýar. 2008-2018-nji ýyllarda türkmen bazaryna bu zawodyň 9 müňden gowrak ýük awtoulaglary we ýörite tehnikalary getirildi. Bu tehnikalar we ýük awtoulaglary ýurduň ykdysadyýetiniň dürli pudaklarynda giňden peýdalanylýar. Türkmenistanda Aşgabatda, Balkanabatda, Maryda we Türkmenabatda «KAMAZ-nyň» dilerlik merkezleri döredildi.