25-nji martda Senagatçylar we telekeçiler birleşmesinde harytlaryň belgilenilmegi üçin enjamlary işläp taýýarlamak we öndürmek hem-de programma üpjünçiligi boýunça dünýäniň öňdebaryjy kompaniýalarynyň biri bolan “SICPA” şweýsar kompaniýasynyň wekilleri bilen duşuşyk geçirildi, diýip TSTB-niň saýty habar berýär.
“SICPA” kompaniýasynyň müdiriýetiniň başlygynyň we baş direktorynyň ýörite maslahatçysynyň ýolbaşçylygyndaky wekiliýeti TSTB-ň başlygy, müdiriýetiň agzalary we birnäçe bölümleriň, şeýle hem, Türkmen logistika assosiasiýasynyň ýolbaşçylary garşy aldylar.
Myhmanlar TSTB-niň köpugurly işleri, onuň agzalary tarapyndan durmuşa geçirilýän iri möçberli taslamalar bilen tanyşdyryldy. Olara türkmen hususy işewürliginiň kärhanalarynyň işine halkara standartlarynyň girizilýändigi hem-de harytlary we hyzmatlary awtomatlaşdyrylan usulda kesgitlemek boýunça tehnologiýalaryň ulanyşa girizilýändigi hakynda habar berildi.
“SICPA” kompaniýasynyň wekilleri harytlaryň belgilenilmeginiň, kesgitlenilmeginiň we yzarlanylmagynyň howpsuzlygyny üpjün etmek boýunça öňdebaryjy tehnologiýalary ulanyşa girizmekde we çözgütleri işläp taýýarlamakda kompaniýanyň gazanan üstünlikleri we işleriň gönükdirilen ugurlary hakynda gürrüň bermek bilen hyzmatdaşlyk hakynda özleriniň tekliplerini berdiler.
