Daniýada klimatyň üýtgemeginden halas etmek maksady bilen planeta üçin zyýanly zyňyndylara täze salgyt girizildi. Ýewropa ýurdunyň häkimiýetleri bu çäre atmosfera goýberilýän kömürturşy gazynyň (CO2) zyňyndylaryny 70% azaltmaga kömek eder diýip hasaplaýarlar. Bu barada hökümete salgylanyp, TV 2 teleýaýlymy habar berýär. Muny lenta.ru ýetirýär.
Klimat we energetika ministri Dan Ýorgensen şeýle salgydyň girizilmegini taryhy waka diýip atlandyrdy. “2030-njy ýyla çenli 4,3 mln tonna möçberindäki CO2 zyňyndylary azaldylar, biziň ýurdumyzda hapa önümçilik ekologiýa taýdan arassa önümçilikden has gymmat bolar” – diýip, ol düşündirdi.
Salgydyň möçberi kömürturşy gazynyň bir tonnasy üçin 750-den 1,1 müň Daniýa kronasyna (takmynan, 105 ýa-da 158 dollar) çenli bolar. Töleg ýurduň çägindäki ähli kompaniýalara degişli, ýöne nebitgaz kärhanalary ýeňillik alar, bu barada jikme-jik habar berilmeýär.
