Saud Arabystany 2025-nji ýylda Ýapyk binalarda we söweş sungaty boýunça VII Aziýa oýunlarynyň (Asian Indoor and Martial Arts Games - AIMAG) geçiriljek ýeri diýlip tassyklandy.
Saud Arabystanynyň Şazadasy, Olimpiýa we Paralimpiýa komitetiniň prezidenti Abdulaziz bin Turki Al-Feýsal Aziýanyň Olimpiýa maslahaty bilen çäräni geçirmek hakyndaky resmi ylalaşyga gol çekişlikde, munuň ýakyn günlerde Patyşalykda geçjek bir topar uly sport çäreleriniň biri boljakdygyny aýtdy.
Şeýle-de, ol soňky ýyllarda Saud Arabystanynyň sport dünýäsinde örän uly öňegidişliklere eýe bolandygyny, muňa ýurduň iri çäreleri we ýaryşlary geçirmäge bildirýän üstünlikli talaplarynyň şaýatlyk edýändigini, şolaryň arasynda 2034-nji ýylyň Aziýa oýunlarynyň we 2023-nji ýylda geçjek Bütindünýä söweş sungaty oýunlarynyň bardygyny nygtady.
AIMAG ilkinji gezek 2005-nji ýylda Tailandda geçirilipdi, soňra 2007-nji ýylda Makaoda, 2009-njy ýylda Wetnamda, 2013-nji ýylda Günorta Koreýada we 2017-nji ýylda bolsa Aşgabatda bolupdy. Indiki ýyl Tailandda şu formatdaky altynjy oýunlar geçer, ol COVID-19 sebäpli 2021-nji ýyldan bäri yza süýşürilip gelinýärdi.
