Ispaniýanyň «Atletiko» futbol kluby Çempionlar ligasynyň 1/8 final duşuşygynyň jogap oýnunda «Mançester Ýunaýtedden» 1:0 hasabynda üstün çykdy. Duşuşyk Mançesterde «Old Trafford» stadionynda geçirildi.
Ýeke-täk goly 41-nji minutda Renan Lodi geçirdi. Madridde geçirilen birinji oýun 1:1 hasabynda tamamlanypdy. Iki oýnuň jemleri boýunça «Atletiko» Çempionlar ligasynyň çärýek finalyna çykdy. Onuň garşydaşy 18-nji martda geçiriljek bije çekilşikde belli bolar.
«Mançester Ýunaýtediň» hüjümçisi Kriştianu Ronaldu Çempionlar ligasynda oýnan wagt dowamlylygy boýunça Iker Kasilýasyň rekordyny täzeledi. Kasilýasyň görkezijisi 15 908 minutdy. Ronaldu bu görkezijini «Atletiko» bilen duşuşygyň 47-nji minudynda geçdi.
Çempionlar ligasynyň final duşuşygy 28-nji maýda Parižde geçiriler.
