Ýakynda Russiýanyň "Soýuz MS-19" kosmos gämisi "Çagyryş" filminiň ekipažy bilen orbita çykdy. Bu barada RIA Nowosti-niň habarçysy Baýkonur kosmodromyndan habar berdi.
Kinoekipažynyň düzümine režissýor Klim Şipenko, aktrisa Ýuliýa Peresild we kosmonawt Anton Şkaplerow girýär. Aýratyn bellemeli zat, bu uçuş arkaly taryhda ilkinji gezek professional artistler kosmosa çykdylar, şeýle hem "Soýuz" kosmos gämisi ilkinji gezek bort inženeriniň kömegi bolmazdan komandiriň ýeke özüniň dolandyrmagynda kosmos stansiýasyna bardy.
Kosmos stansiýasyna barlandan soňra, Şkaplerow Peresild bilen Şipenkonyň özüni duýşunyň gowudygyny, enjamlaryň kadaly işleýändigini Ýere habar berdi.
Peresild we Şipenko kosmos stansiýasynda 12 günläp bolarlar. Olaryň 17-nji oktýabrda gazak sährasyna gonmagyna garaşylýar.
