Şu ýylyň sentýabr aýynda Norwegiýada elektromobil satuwy boýunça rekord täzelendi. Şeýle maglumatlary Norwegiýanyň Ýol hereketi baradaky maglumatlar geňeşi neşir etdi diýip, TASS habar berýär.
“Sentýabr aýynda hasaba alnan 17 992 täze hususy awtomobilden 13 941 sanysy ýa-da 77,5%-i elektromobilleriň paýyna düşdi. Geçen ýylyň degişli aýy (öňki rekord goýlanda) bilen deňeşdirilende, ösüş 45,8% boldy” – diýlip, habarda aýdylýar.
Gurama sentýabr aýynda satylan ähli görnüşli awtomobilleriň umumy sanynyň hem rekord bolandygyny belleýär.
2021-nji ýylyň geçen aýlarynda ýurtda tas 129 müň täze hususy awtomobil satyldy, bu 2020-nji ýylyň degişli döwrüne garanda, 35% köpdür. Elektrokarlaryň paýy 62,5% bolup, bu bir ýyl ozalkydan 12% köpdür.
Norwegiýa elektrik ulaglaryny ornaşdyrmagyň tizligi boýunça ýewropa ýurtlarynyň arasynda lider hasaplanylýar. Norwegiýanyň häkimiýetleriniň meýilnamasyna laýyklykda, 2025-nji ýyla çenli ýurtdaky her bir täze hususy we ýük awtomobilinde atmosfera üçin zyňyndylar bolmaly däl.
