«Pari Sen-Žermen» toparyň baş tälimçisi Maurisio Poçettino bilen şertnamanyň möhletini uzaltdy. Argentinaly hünärmeniň klub bilen täze şertnamasy 2023-nji ýyla çenli niýetlenýär diýip, championat.com habar berýär.
“Men örän bagtly we diňe özüm üçin däl, ştab üçin hem begenýärin. Biziň üçin klubuň goldawyny we ynamyny duýmak örän möhüm we biz janköýerleriň bize buýsanmagy üçin elimizden gelenini ederis. Ine, şunuň üçin biz maksatlarymyza ýetmek isleýäris. 20 ýyl mundan ozal men bu ýerde kapitan bolupdym, şu gün bolsa men bu toparyň tälimçisi. Bu hasyl bolan arzuw” – diýip, klubuň metbugat gullugy Poçettinonyň sözlerini getirýär.
Poçettino ýanwar aýynyň başynda “PSŽ-niň” ýolbaşçysy bolupdy, ol bu wezipede nemes hünärmeni Tomas Tuheliň ornuny çalşyrdy.
Pariž toparynyň ýolbaşçysy bolany bäri Poçettino Fransiýanyň Kubogyny aldy, Çempionlar ligasynyň ýarym finalyna çykdy, şeýle-de çempionatda ikinji orny eýeledi. Mundan öň Maurisio “Tottenhem Hotspurda” işledi.
