Meşhur niderlandly hünärmeni Dik Adwokat futbol boýunça Kýurasaonyň milli ýygyndysynyň baş tälimçisi wezipesine dolanyp gelýär.
78 ýaşly tälimçi iýun aýynda geçiriljek dünýä çempionatynda topara ýolbaşçylyk eder. Ol şeýle derejedäki ýaryşlaryň taryhynda iň garry tälimçi bolar.
Mundan ozal, Adwokat milli ýygyndy bilen saýlama tapgyryndan üstünlikli geçipdi, emma 2026-njy ýylyň fewralynda maşgala ýagdaýlary sebäpli wezipesinden çekilmäge mejbur bolupdy. ESPN neşiriniň berýän maglumatyna görä, şu ýylyň mart aýynda geçirilen şowsuz ýoldaşlyk duşuşyklaryndan soň (Awstraliýadan 1:5 we Hytaýdan 0:2 hasabynda utulmagy), tälimçiniň dolanyp gelmegini futbolçylaryň özleri talap edipdirler.
Kýurasao Futbol federasiýasyna hemaýatkärler tarapyndan edilen maliýe basyşy hem bu kararda goşmaça ýagdaý boldy.
11-nji maýda guramanyň resmi saýty fewral aýyndan bäri baş tälimçi bolup işlän Fred Rýutteniň wezipesinden gidendigini habar berdi.
Dünýä çempionatynyň toparçalaýyn tapgyrynda Kýurasaonyň ýygyndysy Germaniýanyň, Kot-d'Iwuaryň we Ekwadoryň toparlary bilen duşuşar.
