BMG-niň Baş Assambleýasynyň (BA) sentýabr aýynda ýokary derejeli hepdesi her ýurtdan dört wekiliň gatnaşmagynda ýüzbe-ýüz geçiriler. Bu barada BMG-niň BA-nyň 75-nji sessiýasynyň başlygy Wolkan Bozkyryň resmi däl maglumat hatynda aýdylýar diýip, TASS habar berýär.
“Nýu-Ýorkdaky koronawirus bilen bagly ýagdaýyň gowulaşandygy üçin, başlyk Baş Assambleýanyň zalynda mümkin bolan adam sanyny her ýurtdan bir adamdan 1+1 wekiliýete, ýokary derejeli hepde üçin – 1+3 wekiliýete çenli köpeltmek kararyna geldi” – diýlip, hatda bellenilýär.
Şeýle-de, resminamada özüniň wekiliýetini Nýu-Ýorka iberip bilmeýän ýurtlar üçin wideo çykyşlarynyň mümkin boljakdygy aýdylýar.
Bellenilişi ýaly, BA-nyň başlygynyň ýokary derejeli hepdäni ýüzbe-ýüz geçirmek üçin işjeň goldaw bermegi netijesinde “BMG agza ýurtlar umumy syýasy çykyşlara gatnaşmak derejelerini özleri kesgitläp bilerler”. Başlygyň hatynda ýurtlaryň wekilleriniň BMG-niň ştab-kwartirasynda ikitaraplaýyn duşuşyklary geçirip biljekdigi, munuň üçin Bütindünýä guramasynyň aýry otaglary berjekdigi hem bellenilýär.
Baş Assambleýanyň umumy syýasy çykyşlary sentýabryň soňky hepdesinde geçirilýär.