CNPC korporasiýasynyň bir bölegi bolan China Petroleum Engineering Construction hytaý kompaniýasy “Bagtyýarlyk” şertnamalaýyn çägiň günbatar bölegindäki alty gaz ýatagynda ýerüsti desgalary taslamak we gurmak boýunça bäsleşikde ýeňiji boldy diýip, Türkmenbaşydaky nebiti gaýtadan işleýän zawodlaryň toplumynyň saýtynda habar berilýär. Muny ORIENT ýetirýär.
Taslamanyň çäginde Gadyn, Demirgazyk Gadyn, Iljik, Gündogar Iljik, Kiştuwan we Günbatar Kiştuwan ýataklaryny ulanyşa girizmek meýilleşdirilýär.
Ýataklarda 22 guýy, 4 gaz ýygnaýjy stansiýa, turbageçirijiler, inžener-tehniki üpjünçilik, şol sanda elektrik üpjünçiligi we suw üpjünçiligi ulgamlary, şeýle-de beýleki önümçilik infrastruktura desgalary gurlar.
Täze ýataklaryň umumy taslama kuwwaty ýylda 1,8 mlrd kub metr gaza barabar bolar.
Häzirki wagtda China Petroleum Engineering Construction “Bagtyýarlyk” şertnamalaýyn çägiň gündogarynda ýerleşýän Günbatar Joramergen, Gökmiýar we Daşrabat ýataklarynda ýerüsti desgalaryny gurýar.
