Hytaýlylar kosmosda barha ilerleýärler. Bu babatda olaryň indiki maksady Ýupitere uçmak bolup durýar diýip, 3dnews.ru habar berýär.
Hytaýlylar ençeme gyzykly we syrly hadysalar bolup geçýän Ýupitere 2029-njy ýylda uçarlar. Munuň özi eýýäm 2027-nji ýylda Ýerden ugramalydygyny aňladýar.
Hytaý metbugatynyň habaryna görä, Ýupitere kosmos stansiýasyny ibermek meselesi bireýýäm çözüldi diýen ýaly. Ýurduň häkimiýetleri bu taslamany tassykladylar we häzir bu babatdaky işler ylalaşmak tapgyrynda barýar. Hytaýlylaryň kosmosdaky ýene bir gyzykly missiýasy 2028-nji ýylda Marsdan Ýere toprak nusgalaryny getirmek bolar. Şeýle missiýany şol wagt ýa-da şondan bir ýyl öň NASA-nyň hem meýilleşdirýändigi aýdylýar.
Soňky birnäçe ýylda Hytaý özüni kosmosda iň geljegi uly ýurt hökmünde görkezdi. Şu wagta çenli ol açyşlary boýunça diňe Amerikanyň Birleşen Ştatlaryndan we SSSR-den yza galýar. Ýöne häzirki güýçli depginini göz öňünde tutsaň, onuň geljekde kosmosda liderlik etjekdigine ynam bildirmek bolýar.
Ýatlap geçsek, şu ýylyň maý aýynda Hytaý öz marsohodyny Marsa gondurdy we adamzat taryhynda Gyzyl planeta mobil robot stansiýasyny iberen üçünji ýurt boldy.