Hytaý pandemiýa garşy göreşmek üçin ösüp barýan ýurtlara $3 mlrd berer

Hytaý pandemiýa garşy göreşmek üçin ösüp barýan ýurtlara $3 mlrd berer

Hytaý hökümeti pandemiýa garşy göreşmek we ykdysady ösüşi dikeltmek üçin ýakyn üç ýylda ösüp barýan ýurtlara ýene 3 mlrd dollar kömek berer. Bu barada HHR-iň prezidenti Si Szinpin Saglygy goraýyş boýunça global sammitinde wideokonferensiýa arkaly mälim etdi. Bu barada TASS habar berýär.

Ol Hytaýyň häzirki wagta çenli dürli ýurtlara COVID-19-a garşy 300 mln doza sanjym iberendigini we daşary ýurtly hyzmatdaşlary bu derman serişdeleriniň ýene-de has köp mukdary bilen üpjün etmekçidigini belledi. Ýurduň hökümeti ösüp barýan ýurtlara sanjym öndürmek tehnologiýasyny bermekde hem ýardam edýär.

“Sanjymlary öndürmek üçin awtorlyk hukugynyň berilmegini goldaýandygyny mälim etmek bilen, Hytaý Bütindünýä söwda guramasy we beýleki halkara guramalar tarapyndan degişli kararlaryň tiz kabul edilmegini hem goldaýar” – diýip, döwlet ýolbaşçysy sözüniň üstüni ýetirýär.

Ýewropa komissiýasynyň başlygy Ursula fon der Lýaýeniň we Italiýanyň premýer-ministri Mario Draginiň hut özüniň gatnaşmagyndaky sammit Rimdäki Pamfili Willasynda geçýär. Onuň ahyrynda häzirki pandemiýa bilen göreşmegiň we geljekde keseliň ýaýramagynyň öňüni almagyň esasy ýörelgelerini öz içine alýan Rim jarnamasyny kabul etmek meýilleşdirilýär.