Bill Geýts adamzat taryhyndaky iň uly 3 üstünlik hakynda aýtdy

Bill Geýts adamzat taryhyndaky iň uly 3 üstünlik hakynda aýtdy

"Microsoft-y" esaslandyryjy we milliarder haýyr-sahawatçy Bill Geýts adamzadyň iň möhüm oýlap tapyşlary baradaky pikirini paýlaşdy. Geýts sanjymlaryň adamzadyň taryhynda iň uly ylmy üstünlikdigine ynanýar. Ol bu barada "Handelsblatt" gazetine beren interwýusynda aýtdy.

“2020-nji ýylda başdan geçirenlerimizi göz öňünde tutup, ilki bilen sanjymlary görkezmeli. Koronawirus sanjymlary 2021-nji ýylda pandemiýany ýeňip geçjekdigimize uly umyt döretdi"-diýip, milliarder haýyr-sahawatçy belledi. Onuň pikiriçe, sanjymlar köp kesellere garşy göreşmäge mümkinçilik berýär.

Ikinji möhüm üstünlik - mikroprosessoryň oýlap tapylmagy diýip, Geýts aýtdy.

"Elbetde, şahsy kompýuter diýen zady mümkin eden, kompýuter ylmynda öwrülişik eden we soňky 50 ýylda täsirli innowasiýa tolkunyny döreden mikroprosessoryň uly muşdagydygym sizi geň galdyrmaz" diýip, Geýts aýtdy.

Ýene bir möhüm açyş - dünýä oba hojalygynyň önümçiliginiň ösmegine goşant goşan, 1940-1970-nji ýyllaryň oba hojalygyndaky özgertmeler toplumy bolan Ýaşyl rewolýusiýa bolup durýar.

“Ondan öň tutuş dünýä ilaty üçin ýeterlik iýmit öndürip boljakdygyny göz öňüne getirmek mümkin däldi. Agronom we seleksioner Norman Borlaugyň işi, dürli çaklamalara görä, 1 milliarddan gowrak adamy açlykdan halas etdi"-diýip, Geýts nygtady.