Toyota awtomobil satuwy boýunça dünýä rekordyny täzeledi

Toyota awtomobil satuwy boýunça dünýä rekordyny täzeledi

Ýaponiýanyň Toyota kompaniýasy mart aýynda tutuş dünýäde 982 912 awtoulag satdy, bu 2020-nji ýylyň mart aýy bilen deňeşdirilende, 44,2% köpdür. Şeýlelik bilen, kompaniýa dünýäniň ähli awtoulag öndürijileriniň arasynda aýlyk satuw rekordyny goýdy. Muny kompaniýa tarapyndan neşir edilen maglumatlar delillendirýär diýip, TASS habar berýär.

Kompaniýanyň dünýä satuwy yzygider ýedinji aý ýokarlanýar. Kompaniýa mart aýynda 843 393 awtomobil öndürdi, bu 2020-nji ýylyň mart aýyna garanda, 31,6% köpdür. Şonda pandemiýa global awtoöndürijilerini zawodlarynda önümçiligi togtatmaga mejbur edipdi.
Toyota awtomobilleriniň dünýä satuwy birinji çärýekde, esasan, ABŞ-da we Hytaýda islegiň artmagy bilen 19,1% ýokarlandy. Şol bir wagtyň özünde Toyota-nyň dünýä satuwy koronawirus pandemiýasy sebäpli 2020-nji maliýe ýylynda (2021-nji ýylyň 31-nji martynda tamamlandy) 4%, ýagny 9,09 mln awtomobile çenli, awtomobilleriň önümçiligi bolsa 6,4%, ýagny 8,18 mln awtomobile çenli azaldy.