Garyşyk göreşiň türkmenistanly wekili Döwletjan Ýagşymyradow Bellator 257 ýaryşynyň çäklerinde amerikaly Kori Anderson bilen duşuşygynyň öň ýanynda agramyny çekdirdi.
MMA Junkie saýtynyň habar bermegine görä, türkmen pälwanynyň agramy 92,7 kg (204,5 funt), Andersonyň agramy — 92,8 kg (204,75 funt) boldy.
ММА Bellator 257 ýaryşy 16-njy aprelden 17-sine geçilýän gije Ankaswillede geçiriler (ABŞ, Konnektikut ştaty).
Göreş agşamynyň esasy duşuşygy russiýaly Wadim Nemkow bilen amerikaly Fil Dewisiň arasynda geçiriler. Bu agşam şeýle hem Döwletjan Ýagşymyradow Kori Anderson bilen duşuşar.
Duşuşygyň ýeňijisi ýarym finala çykar we Bellatoryň agyr agramda çempiony Raýan Beýder bilen duşuşar. Gran-Priniň baýrak gaznasy 1 million dollar.
