Baş rollary Uill Smit bilen Martin Lourensiň ýerine ýetirmeginde “Ýaramaz ýigitler baky” atly komediýa görnüşindäki film People’s Choice Awards amerikan baýragynyň garaýşy boýunça, ýylyň filmi boldy diýip, Deadline portaly habar berýär. Muny RIA Nowosti belläp geçýär.
1995-nji we 2003-nji ýyllaryň hitleriniň dowamy bolan “Ýaramaz ýigitler baky” 15-nji ýanwarda çykdy. Bu filmiň býujeti 90 mln dollara, dünýä prokatynda girdeji ýygymy 426,5 mln dollara barabar boldy.
“Iň gowy komediýa” nominasiýasynda “Posalaryň budkasy – 2” filmi ýeňiji boldy. “Gamilton” iň gowy drama filmi, maşgala bolup tomaşa etmek üçin iň gowy kino “Öňe” multfilmi boldy. “Hyjuw anatomiýasy” “Iň gowy serial” nominasiýasynda ýeňdi, “Riwerdeýl” iň gowy drama teleserialy boldy, hyýaly seriallaryň arasyndan “Waýnona Erp” baýrak aldy.
Uill Smit iň gowy aktýor, Tiffani Heddiş iň gowy aktrisa diýlip yglan edildi. Jennifer Lopes “Icon Award” ýörite baýraga mynasyp boldy. Aýdym-saz kategoriýasynda BTS (ýylyň topary) ýeňiji boldy, olaryň “Dynamite” aýdymy iň gowy aýdym we iň gowy aýdym-saz wideosy baýragyna mynasyp boldy, “Map of the Soul: 7” albomy bolsa ýylyň albomy boldy. Jastin Biber bilen Ariana Grande ýylyň artisti diýlip yglan edildi.
People’s Choice Awards baýragy tomaşaçylaryň ses bermegi esasynda pop-medeniýet işgärlerine berilýär. Ol 1975-nji ýyldan bäri gowşurylýar, 2005-nji ýyldan bäri ses berme onlaýn görnüşinde geçýär.