Iňlis diliniň sözlügi bolan Collins "milliardlarça adamyň umumy tejribesini" özünde jemleýän "lockdown" sözüni 2020-nji ýylyň sözi diýip saýlady. Bu barada INTERFAX.RU habar berýär.
"Lockdown" sözi "syýahata, jemgyýetçilik gatnaşyklaryna we köpçülik ýerlerine barmaga berk çäklendirmeleriň girizilmegi" hökmünde kesgitlenilýär. Leksikograflar bu sözüň pandemiýa şertlerinde ulanylyş ýygylygynyň düýpgöter ýokarlanandygyny, ýagny 250 müň gezekden gowrak ulanylandygyny hasaba aldylar, bu bolsa geçen ýylda bellige alnan 4,000 hadysadan ep-esli ýokarydyr.
Sözlügiň düzüjileri bu sözüň agyr bogunlarynyň ýylyň iň gorkunç ýagdaýyny aňladýandygyny belleýärler. Olar adaty jemgyýetçilik durmuşyny emele getirýän hemme zat diýen ýaly togtadylanda, lokdaun ýagdaýyny milli durgunlyk bilen deňeşdirýärler.
"Lokdaundan" başga-da, ýylyň iň gowy 10 sözüne "aýlyksyz zähmet rugsady" ("furlough"), "işde hökman bolmaly işgär" ("key worker"), "öz-özüňi izolýasiýa etmek", "sosial aralyk" we "koronawirus" sözleri degişli edildi.
Pandemiýa degişli däl sözleriň hataryna ilkinji onluga "Megxit" (şazada Garriniň we aýaly Meganyň şa maşgalasyndan çykmagyny aňladýan, Breksit ýaly söz), "BLM" (jynsparazlyga garşy hereketiň ady - Black Lives Matter), "TikToker" "(TikTok platformasynyň ulanyjysy) we "mukbang" ("mokpan", wideoblogeriň gabanyp otyrka tomaşaçylar bilen habarlaşýan ýaýlymy) sözleri girdi.
Collins 2019-njy ýylda “Howa topalaňy”, 2017-nji ýylda bolsa "feýk-nýus" sözlerini ýylyň sözi diýip atlandyrypdy.