Finlýandiýanyň paýtagty Helsinkiniň howa menzilinde itleriň ýörite topary işe başlady, olar ýolagçylarda koronawirus ýokançlygyny ysy boýunça ýüze çykararlar. Bu barada howa menzilinde işleýän kompaniýanyň berýän maglumatyna salgylanyp, RIA Nowosti habar berýär.
"COVID-19 itleri Helsinki howa menziliniň 2 geliş zalynda işe başlady. Itler synaga gatnaşýanlara berlen synag süpürgiçleriniň kömegi bilen, koronawirusy anyklamak üçin türgenleşdirildi. Synaga gatnaşmaklyk meýletindir we esasan, daşary ýurtlardan gelýän ýolagçylara niýetlenendir" - diýlip, habarda aýdylýar.
Barlagda ýolagçydan tenini süpürgiç bilen süpürmek soralýar. Soň süpürgiç ite äkidilýän ýörite gaba atylýar. Prosedura tutuşlygyna alanyňda hem bir minutdan köp dowam etmeýär.
Synag wagtynda şahsy maglumatlar ýygnalmaýar. Netije položitel bolup çyksa, goşmaça görkezmeler üçin adam maglumat-lukmançylyk merkezine ugradylýar. Itleri ulanmak boýunça synag dört aý dowam eder.
Mundan öň Finlýandiýanyň howa menzilinde ýolagçylarda koronawirusy peşewi arkaly anyklamak boýunça itler bilen şuňa meňzeş synaglar geçirilipdi. Şeýle hem awgust aýynda şuňa meňzeş synagyň Dubaýyň howa menzilinde geçirilendigi habar berildi.