Koronawirus pandemiýasy dünýädäki millionlarça adamyň psihiki saglygyna täsir etdi diýip, Bütindünýä saglygy goraýyş guramasynyň baş direktory Tedros Adanom Gebreýesus Ženewada geçirilen brifingde aýtdy. Bu barada Sputnik habar berýär.
Gebreýesus: "COVID-19 döredýän howsalasy we gorkusy, şeýle hem psihiki saglyga ýardam bermek işiniň bozulmagy nukdaýnazaryndan millionlarça adamyň psihiki saglygyna täsir etdi" - diýip nygtaýar.
Şeýle hem Gebreýesus keseliň diňe özüniň däl, eýsem, dürli ýurtlarda kabul edilen wirusa garşy göreş çäreleriniň hem adamlaryň psihikasyna güýçli täsir edendigini belläp geçdi. Ilkinji nobatda, sosial gatnaşyklary çäklendirmek zerurlygy muňa mysal bolup durýar.
BSGG-niň başlygynyň aýtmagyna görä, COVID-19 pandemiýasy başlamazdan ozal hem adamlaryň psihiki saglygyna ýeterlik üns berilmedi. Özi-de bu "dünýäde psihikasy bozuk bir milliarda golaý adamyň ýaşaýandygyna, her ýyl üç million adamyň alkogol içgilerinden ölýändigine we her 40 sekuntda dünýäde bir adamyň öz janyna kast edýändigine" garamazdan şeýle boldy.
Psihiki saglyk meselesi global häsiýete eýe, ýöne psihologiki meseleler boýunça ýokary hilli lukmançylyk kömeginden diňe az sanly adam peýdalanýar. Şeýlelik bilen, Gebreýesusyň pikiriçe, ýaşaýjylaryň köpüsiniň pes we orta girdejisi bolan ýurtlarda psihiki we newrologik näsazlyklary bolan adamlaryň 75%-den gowragy bejergi almaýar.