«Lion» 10 ýylda ilkinji gezek Çempionlar ligasynyň ýarym final tapgyryna çykdy

«Lion» 10 ýylda ilkinji gezek Çempionlar ligasynyň ýarym final tapgyryna çykdy

Lissabonda Çempionlar ligasynyň 1/4 final tapgyrynyň duşuşyklary tamamlandy.
Jemleýji duşuşykda «Žoze Alwalade» stadionynda «Mançester Siti» «Liondan» 1:3 hasabynda ýeňlişe sezewar boldy. Fransuz klubynyň hüjümçisi Mussa Dembele duşuşygyň 75-nji minudynda oýna girip, dubl etmegi başardy hem-de Hosep Gwardiolanyň şägirtlerini Çempionlar ligasyndan çykardy.

Şeýlelikde, ýaryşyň ýarym final tapgyryna gatnaşýanlaryň ählisi belli boldy.
Sişenbe güni, 18-nji awgustda, «RB Leýpsig» (Germaniýa) «PSŽ» (Fransiýa) bilen duşuşar.
Çarşenbe güni, 19-njy awgustda, «Lion» (Fransiýa) we «Bawariýa» (Germaniýa) duşuşar.
Belläp geçsek, 1990/91 möwsüminden bäri ýaryşyň ýarym final tapgyrynda ilkinji gezek Angliýadan, Ispaniýadan ýa-da Italiýadan ýeke klub hem çykyş etmez.