Portugaliýanyň milli ýygyndysynyň we “Al-Nasr” saud klubunyň hüjümçisi Kriştianu Ronaldu Liga Portugal Awards dabarasynda “Ähli döwürleriň iň gowy futbolçysy” baýragyny aldy. Bu barada Portugaliýa ligasynyň saýtynda habar berilýär.
Bellenilişi ýaly, “Altyn topuň” bäş gezek eýesi bu baýraga millionlarça adamyň söýgüli futbolçysy we dünýä futbolynda uly yz galdyran döwrüň nyşany hökmünde mynasyp boldy.
“Portugaliýa ligasyna “Ähli döwürleriň iň gowy oýunçysy” baýragy üçin minnetdarlyk bildirmek isleýärin. Bilşiňiz ýaly, öz ýurdum üçin bir zat almak meniň üçin uly mertebe” – diýip, 40 ýaşly futbolçy wideo ýüzlenmesinde aýtdy.
Sişenbe güni Ronaldu Wengriýanyň derwezesine penaltiden gol girizip, dünýä çempionatlarynyň saýlama oýunlaryndaky gollaryň sany boýunça rekordy gaýtalady. Bu gol onuň üçin dünýä çempionatlarynyň 49 saýlama oýnunda 39-njy boldy, bu hem onuň netijesini Gwatemalanyň milli ýygyndysynyň hüjümçisi Karlos Ruisiň görkezijisi bilen deňledi. Onuň hasabynda 47 oýunda 39 gol bar.
