Iýun aýynda Russiýa Hytaýa suwuklandyrylan tebigy gaz (STG) bermekde ABŞ-dan öňe geçdi. Hytaýa turbageçiriji gazyny ibermekde bolsa öňdeligi Türkmenistan eýeleýär. Bu barada HHR-iň Baş gümrük gullugynyň maglumatlaryna hem-de "Bloomberg" agentliginiň habaryna salgylanyp, ORIENT habar berýär.
Iýun aýynda Russiýa HHR-e geçen ýylyň degişli döwründäki 67 müň tonnasyna garşy 396 müň tonna suwuklandyrylan tebigy gaz iberdi. Şol bir wagtyň özünde, bu babatdaky görkeziji 20,7% ýokarlandy. Iýun aýynda ABŞ-dan suwuklandyrylan tebigy gazynyň importy 340 müň tonna barabar boldy, munuň özi şu ýylyň maý aýy bilen deňeşdirilende, 2,4% köpdür. 2019-njy ýylyň iýun aýynda bolsa ABŞ Hytaýa suwuklandyrylan tebigy gaz ibermedi.
Hasabat aýynda suwuklandyrylan tebigy gazyň iň iri mukdaryny Hytaý Indoneziýadan getirdi: 988 müň tonna. Bu bolsa ýyllyk nukdaýnazardan 2,6 esse we aýda 3,6 esse köpdür. Hytaýyň iýun aýynda suwuklandyrylan tebigy gaz boýunça importy 5,79 million tonna barabar boldy, bu görkeziji bir ýyl ozalkysyndan, takmynan, 29% ýokarydyr.
Şol bir wagtyň özünde, iýun aýynda HHR-e turbageçiriji gazynyň importynyň derejesi pesligine galdy, ol maý aýy bilen deňeşdirilende, 2,7%, ýagny 2,54 million tonna (takmynan, 3 milliard kub metr) azaldy.
Iýun aýynda Hytaý Russiýadan maý aýyna garanyňda, 3,8 göterim artdyrmak bilen, 215 müň tonna turbageçiriji gazyny (takmynan 0,26 milliard kub metr) import edipdi. Hasabat aýynda turbageçiriji gazynyň köpüsi - ýagny 1,61 million tonnasy (takmynan, 2 milliard kub metr) Türkmenistandan getirildi.
