Türkmen alymlary köp gezeklik lukmançylyk maskalarynyň dürli wiruslardan goramakda täsirliligini subut etdiler. Degişli synaglaryň çäginde ýurduň içinde öndürilen trikotaž we agyr flanelden taýýarlanylan iki gatly maskalar ulanyldy. Bu barada 23-nji iýulda "Neýtralnyý Türkmenistan" gazetinde habar berildi.
Ykdysady nukdaýnazardan “býudjetli” köp gezeklik maskalaryň raýatlar üçin has bähbitlidigi bellenildi. Häzirki wagtda bu şahsy gorag serişdesiniň önümçiligi ýurtda giňden ýola goýuldy.
Şeýle maskalary dakynmagyň netijeliligini öwrenmek boýunça gözlegler Türkmenistanyň Ylymlar akademiýasynyň Tehnologiýalar merkeziniň (ANT) barlaghanalarynda geçirildi. Munda S. Türkmenbaşy adyndaky dokma toplumynda taýýarlanylan nusgalar peýdalanyldy.
Alymlar lukmançylyk önüminiň dizaýn taýdan gurluşynyň hökmany goragy üpjün edýändigini, ýüzüň agyz-burun töwerekleriniň anatomiki aýratynlyklaryna laýyk gelýändigini we ulanylanda oňaýsyzlyk döretmeýändigini bellediler.
12-nji iýulda Türkmenistanyň Saglygy goraýyş we derman senagaty ministrligi ähli raýatlara lukmançylyk maskalaryny geýmegi maslahat berdi. Edaranyň işgärleri munuň howadaky tozanyň köpelmegi bilen baglanyşyklydygyny bellediler. Mundan başga-da, olaryň pikiriçe maskanyň ulanylmagy, aýratyn-da häzirki ýagdaýda dürli wiruslaryň ýokuşma howpuny azaldýar.