TASS-yň Bloomberg iş habarlary agentligine salgylanmak bilen habar bermegine görä, Boeing aerokosmiki korporasiýasy Boeing 747 iki palubaly giň korpusly uçarlaryny çykarmagy bes etmekçi bolýar. Muny inforos.ru ýetirýär.
Korporasiýanyň soňky 747-8 uçaryny Waşington ştatynyň Ewerette şäherindäki kärhanasynda, takmynan, 2 ýyldan ýygnajakdygy bellenilip geçilýär. Agentligiň bellemegine görä, önümçiligi bes etmegiň aýgytly sebäbi koronawirus pandemiýasy sebäpli halkara awiagatnawlaryň saklanylmagy boldy. Şeýle-de, ýolagçylaryň arasynda meşhurlygyna garamazdan, howa ýollarynyň köpüsinde bu uçara ýeterlik derejede isleg bildirilmeýär, çünki awiakompaniýalar uzak aralyga uçuş üçin iki hereketlendirijili uçarlara geçdiler.
Geçen onýyllykda kompaniýa bu modelden 1 571 uçary ýola goýdy, bu model satuw göwrümi boýunça diňe 777-nji modelden yza galýar. 2016-njy ýyldan bäri korporasiýa çykarylýan her 747-8 uçarynda $40 mln ýitirýär. Şunuň bilen baglylykda, maliýe çykdajylary $4,2 milliarda ýetdi. Olaryň önümçiligi bolsa ýylda alty sany uçara çenli kemeldildi. Uçaryň ýolagçy görnüşine iň soňky sargyt ABŞ-nyň prezidenti üçin 2017-nji ýylda edildi.
Agentligiň bellemegine görä, kompaniýanyň Boeing 747 üçin häzir 15 sargydy bar. Olaryň 12 sanysy United Parcel Service amerikan kompaniýasy üçin niýetlenilen. Boeing 747 uçarynyň ilkinji uçuşy 1969-njy ýylyň 9-njy fewralynda boldy, ulanylyşa uçar 1970-nji ýylda girizildi. Döredilen wagtynda bu iň uly, agyr we sygymly ýolagçy uçary bolupdy we Airbus A380 uçary ýüze çykýança, şeýle bolmagynda galdy.
Boeing прекратит выпуск самолетов 747
- 04.07.2020 16:29
- 5.2k+
