Angliýanyň «Kristal Pelas» futbol kluby UEFA-nyň Konferensiýa ligasynyň ýeňijisi boldy. Leýpsig şäherinde geçirilen final duşuşykda ol Ispaniýanyň «Raýo Walýekano» toparyndan 1:0 hasaby bilen üstün çykdy.
Oýundaky ýeke-täk goly 51-nji minutda fransuz hüjümçisi Žan-Filipp Mateta saldy.
Iki topar hem öz taryhynda ilkinji gezek Ýewropa kubogynyň finalynda oýnady. «Kristal Pelas» mundan ozal diňe Angliýanyň Kubogyny, Superkubogyny we dört gezek Angliýanyň Liga kubogyny gazanypdy.
Geçen möwsümde londonly topar Angliýanyň Kubogyna eýe bolup, Ýewropa ligasyna gatnaşmaga hukuk gazanypdylar. Emma, UEFA-nyň birnäçe kluba bilelikde eýelik etmek baradaky düzgünleriniň bozulmagy sebäpli, klub Konferensiýa ligasyna düşürilipdi.
«Transfermarkt» portalynyň maglumatlaryna görä, iki toparyň düzüminiň jemi bahasy biri-birinden ep-esli tapawutlanýar: «Kristal Pelasynyň» oýunçylarynyň bahasy 541,3 million ýewro, «Raýo Walýekanonyňky» bolsa 107,3 million ýewro barabar.
Gazanan bu ýeňşi üçin «Kristal Pelas» 7 million ýewro baýrak alar, «Raýo Walýekano» bolsa finala çykany üçin 4 million ýewro eýe bolar. Deňeşdirip aýtsak, Çempionlar ligasynyň finalyna çykanlara 18,5 million ýewrodan berilýär (ýeňiji goşmaça 6,5 million ýewro alýar), Ýewropa ligasynda bolsa finala ýetenlere 7 million ýewrodan gowşurylýar (ýeňiji goşmaça 6 million ýewro alýar).
Şu möwsümde ýewrokuboklaryň ähli final oýunlarynda iňlis klublary bar: «Aston Willa» Ýewropa ligasynyň ýeňijisi boldy, «Arsenal» bolsa 30-njy maýda Çempionlar ligasynyň jemleýji oýnunda Fransiýanyň PSŽ topary bilen ýüzleşer.
Iňlis klublary Konferensiýa ligasynyň geçirilen bäş möwsüminiň üçüsinde ýeňiji boldular. Mundan ozal ýaryşy «Çelsi» bilen «West Hem Ýunaýted» utupdy.
