Ispaniýanyň «Barselona» futbol kluby bilen baş tälimçi Hans-Diter Flik zähmet şertnamasyny uzaltmak barada ylalaşyk gazandy. Insaýder Fabrisio Romanonyň berýän maglumatyna görä, täzelenen şertnama 2027/28 möwsüminiň ahyryna çenli hereket eder we oňa şertnamany ýene bir ýyl uzaltmak mümkinçiligi hem goşular.
Resminamalara ýakyn wagtda resmi taýdan gol çekilmegine garaşylýar.
61 ýaşly nemes hünärmeni 2024-nji ýylyň maýynda katalonlaryň ýolbaşçylygyna geçdi we eýýäm topar bilen uly üstünlikleri gazanmagy başardy. Onuň ýolbaşçylygynda «Barselona» iki gezek Ispaniýanyň çempiony boldy, iki gezek ýurduň Superkubogyny gazandy, şeýle hem Patyşanyň kubogynyň eýesi boldy.
Klubuň ýolbaşçylary häzirki netijeleri göz öňünde tutup, tälimçä doly ynam bildirýändiklerini mälim etdi.
Hans-Diter Fligiň baý iş tejribesi bar: ol 2019/20 möwsüminde Mýunheniň «Bawariýasyny» «trebla» ýetirip, Bundesligany, Germaniýanyň Kubogyny we Çempionlar ligasyny utdy. Şeýle hem, onuň Germaniýanyň milli ýygyndysy bilen iş tejribesi bar, ol ýerde 2014-nji ýylda Ýoahim Lýowuň kömekçisi hökmünde dünýä çempiony boldy. Öz karýerasynyň dowamynda Flik «Bammental» we «Hoffenhaým» ýaly klublarda hem işledi.
