Angliýanyň «Aston Willa» we Germaniýanyň «Fraýburg» toparlary UEFA-nyň Ýewropa Ligasynyň finalyna çykdy.
«Aston Willa» birinji ýarym finalda «Nottingem Forestden» 0:1 hasabynda utulandan soň, Birmingemdäki öz meýdançasynda geçirilen jogap duşuşygynda oýnuň gidişini üýtgetmegi başardy we garşydaşyny 4:0 hasabynda derbi-dagyn etdi.
«Aston Willanyň» baş tälimçisi Unai Emeri altynjy gezek Ýewropa Ligasynyň finalyna çykdy. Ol 2014-2016-njy ýyllar aralygynda «Sewilýanyň» baş tälimçisi hökmünde bu ýaryşda ýeňiş gazanypdy. 2021-nji ýylda bolsa ispaniýaly hünärmen «Wilýarreal» bilen kubogy eýeledi. Emeri diňe bir gezek — 2019-njy ýylda Londonyň «Arsenalyna» tälim beren döwründe aýgytlaýjy duşuşykda ýeňlişe sezewar boldy. Şonda «Arsenal» «Çelsiden» 1:4 hasabynda utulypdy.
Beýleki ýarym finalda Germaniýanyň «Fraýburg» topary Portugaliýanyň «Bragasyndan» üstün çykdy. Öz meýdançasynda geçirilen jogap oýnunda nemes kluby garşydaşyny 3:1 hasabynda utdy (birinji oýunda 1:2 hasabynda utulypdy).
Ýewropa Ligasynyň finaly 20-nji maýda Stambulda geçiriler.
Konferensiýa ligasynyň finalynda bolsa Angliýanyň «Kristal Pelas» we Ispaniýanyň «Raýo Walýekano» toparlary duşuşar.
Ýarym finalda «Kristal Pelasyň» futbolçylary Ukrainanyň «Şahtýoryndan» üstün çykdy. Olar jogap oýnunda öz öýlerinde 2:1, birinji oýunda bolsa myhmançylykda 3:1 hasabynda ýeňiş gazandy.
«Raýo Walýekano» bolsa myhmançylykda «Strasburg» bilen bolan jogap duşuşygynda hem öz öýündäki netijesini gaýtalady — 1:0.
Konferensiýa ligasynyň aýgytlaýjy duşuşygy 27-nji maýda Leýpsigde bolar.
