«Kowentri Siti» futbol kluby 2001-nji ýyldan bäri ilkinji gezek Angliýanyň premýer-ligasyna (APL) dolanmagyny resmi taýdan kepillendirdi.
Çempionşipiň 43-nji tapgyrynda «Blekbern Rowers» bilen bolan duşuşykda deňme-deň (1:1) oýnap, Frenk Lempardyň topary 86 utuk toplady we ýaryşyň tamamlanmagyna üç tapgyr galanda, iň bolmanda, ikinji orny kepillendirdi. 84-nji minutda goragçy Bobbi Tomas aýgytlaýjy goly geçirdi.
2024-nji ýylyň noýabr ayynda klub 17-nji orunda wagty işe başlan baş tälimçi Frenk Lempard edilen işe, şol sanda öz bitiren işine ýokary baha berdi.
«Men buýsanýaryn. Adatça, ähli tälimçiler oýunçylary öwýär, ýöne men özüme, öz ştabyma we ýigitlere buýsanýaryn. 15 aý mundan ozal biz bu ýere kiçi awtobusda gelipdik. Täze işe başlananda elmydama bolşy ýaly, biz näbellilige tarap ädim ädipdik» – diýip, «Çelsiniň» öňki legendasy oýundan soňky interwýusynda aýtdy.
Geçen möwsümiň pleý-off tapgyryndaky şowsuzlyga garamazdan, hünärmene ikinji synanyşykda «Kowentrini» ýokary diwiziona gaýtaryp getirmek başartdy.
Mundan ozal «Çelsi», «Ewerton» we «Derbi Kaunti» toparlaryna tälim beren 47 ýaşly hünärmen üçin bu üstünlik aýratyn ähmiýete eýe boldy.
«Bu gazananym menin üçin iň möhüm üstünlikleriň biridir. «Çelside» bolmak bagty maňa nesip etdi. Çempionlar ligasyny we dürli titullary gazanmak — bu ajaýyp zat. Emma bu klub bilen we şular ýaly ýagdaýlarda APL-e çykmagy başarmak... Bu menin üçin ähli garaşanlarymdan hem ýokarydyr. Oýunçylaryň bitiren hyzmatlaryny asla peseltmeýärin. Şu toparyň tälimçisidigime örän buýsanýaryn» – diýip, Lempard sözüniň üstüne goşdy.
Klub 2017-nji ýylda dördünji diwiziona çenli aşak düşeninden soň, gaýtadan dikelmek üçin uzak ýol geçdi.
