Moda industriýasynda gündogar äheňlerindäki trendiň («oriental-core») meşhurlygy barha artyp barýar. Günbatar brendleriniň Aziýa we Ýakyn Gündogar medeniýetini durky-düýrmegi, matalarydyr nagyşlary bilen öz toplumlaryndaky lybaslara siňdirjek bolup yhlas edişleri, munuň, hälki bir, «Höwes et–bes et» diýlendäki ýaly däldigine güwä geçýär.
Hakykatdan hem, sazyndan-sözünden müň many çykaryp bolýan Gündogaryň lybaslary-da durşy bilen syr. Iň bärkisi, gündogarly gözeliň başyndaky çalmanyň nädip daňylandygyny-da, özünden başga kişiniň bilip biläýjegi gümana.
Moda gyzyklanmalary dürli görnüşde ýüze çykýar. Käbir brendler öz lybas görkeziliş dabaralaryny Aziýa şäherlerinde geçirseler, beýlekileri toplumlarynda boýdan-başa gündogar däp-dessur elementlerini ulanýarlar. Şeýdip, podiumlarda yzly-yzyna kimono, tunika, şalwar we sipaýo stilindäki köýnekleri geýen günbatarly modeller peýda bolýar.
Geçen tomus ýoň bolan şalwarlar bu möwsümde hem arzyly. Olary dürli brendleriň toplumlarynda – keşdelenen açyk reňkli nusgalardan başlap, has sada görnüşlerde-de görmek bolýar. Dizaýnerler lybaslaryny durnanyň, ýelpawajyň şekilleri bilen nagyşlamagy, şeýle hem köýnekleriň durkuny Aziýanyň täsin binagärlik aýratynlyklaryna meňzetmegi-de gowy görýärler.
Guşakly giň kimonolar, žakkard matadan tunikalar we biliňe dakylýan ýüpek şarflar hem ýatdan çykanok. Göwrä saralyp duran sipaýo köýnekleriň boýy bolsa, hem uzyn, hem gysga ölçegde çykarylýar.
Trend aksesuarlara hem täsir etdi. Gündizki we agşamky gezelençlere egne tunika, kelläňe çalma we şoňa meňzeş başgaplary geýip çykmak ýörgünli. Has owadan görünmek isleýänler eginlerine nepis ýeňil ýapynjalary hem atynyberýärler.
Şeýde-şeýde, Günbatar modasy ýuwaşlyk bilen öz ýüzüni Gündogara tarap öwürýär. Munuň netijesiniň nähili boljakdygyny bilmek üçin bolsa, moda dünýäsinden zol-zol habar alyp durmak gerek.
