Argentinaly hünärmen Hawýer Maskerano «Inter Maýami» futbol klubunyň baş tälimçisi wezipesini terk etdi. MLS toparynyň resmi saýtynda habar berlişi ýaly, 41 ýaşly tälimçi şahsy sebäplere görä wezipesinden çekilmek barada çözgüde geldi.
«Ilki bilen, maňa bildiren ynamy üçin kluba, guramanyň her bir işgärine, ýöne aýratyn-da ýatdan çykmajak pursatlary başdan geçirmegimize ýardam eden oýunçylara minnetdarlyk bildirýärin. Şeýle hem janköýerlere sagbolsun aýdýaryn, sebäbi olar bolmasa bularyň hiç biri mümkin bolmazdy» – diýip, Maskerano belledi.
Ýatlap geçsek, argentinaly hünärmen kluba 2024-nji ýylyň noýabrynda ýolbaşçylyk edip başlady. Onuň tälimçiliginde Lionel Messiniň çykyş edýän topary 2025-nji ýylda öz taryhynda ilkinji gezek MLS-iň çempiony diýen ady aldy.
Amerikan klubuna gelmezinden ozal, Maskerano Argentinanyň ýaşlar we olimpiýa ýygyndy toparlary bilen işleşipdi. Oýunçy hökmünde bolsa ol «Barselona» we «Liwerpul» ýaly klublarda çykyş edip, dünýä derejesinde meşhurlyk gazandy, şeýle hem öz ýurdunyň milli ýygyndysynda 147 oýna gatnaşdy.
