Google, OpenAI, Anthropic we xAI ýaly tehnologiýa ägirtleriniň döreden emeli aň modelleri Iňlis Premýer-ligasynyň oýunlaryna wirtual pul goýup, uly zyýan çekdiler. Financial Times neşiriniň habar bermegine görä, bu synagy General Reasoning startapy geçirdi.
Synagda sekiz sany iň güýçli EA modeline 2023–2024-nji ýyllaryň möwsüminiň jikme-jik statistikasy berildi. Olaryň maksady, iň ýokary peýdany getirjek goýum strategiýasyny düzmekdi.
Claude Opus 4.6 (Anthropic) iň oňat netijäni görkezen modeldir. Onuň ortaça zyýany 11% boldy.
Gemini 3.1 Pro (Google) başda örän şowly başlap, 34% peýda görkezdi, ýöne möwsümiň ahyrynda ähli puluny ýitirip, tüwmaýak galdy.
Grok 4.20 (xAI) örän çaltlyk bilen ähli pulunyň aňrysyna çykdy.
Eýsem, emeli aňyň ýeňilmeginiň sebäbi nämeden?
Hünärmenleriň pikiriçe, EA kod ýazmak ýaly birsyhly işlere ökde bolsa-da, ynsan tebigatynyň çylşyrymlylygyny we töwekgelligini öwrenip bilmeýär. Hakykatdan hem, futboldaky oýunçylaryň ruhy ýagdaýy, garaşylmadyk şikesler, eminleriň şahsy kararlary ýaly faktorlar, köplenç diýen ýaly, hesip edeniňi bir başga, nesip edeniňem düýbünden başga çykarýar.
