ABŞ-nyň Tehas ştatynyň kenarýakasynda «gök aždarhalar» diýlip atlandyrylýan seýrak görnüşli zäherli molýuskalar tapyldy. Bu barada People neşiri habar berýär.
Harta ylmy-barlag instituty (HRI) plýažlara gelýänlere bu açyk gök reňkli, mylkyk deňiz jandaryna el degirmegiň güýçli ýanyga uçradyp biljekdigi üçin, olara golaýlaşmazlygy duýdurdy.
«Men olaryň zäheriniň «portugal gämisinden» (portuguese man o'war) takmynan üç esse güýçli bolýandygyny eşitdim. Muňa ynanmagam kyn, sebäbi men, eger ölçemeli bolsa «gäminiň» awundyryşyny-da 10-da 9 balla çenli kesgitlärdim» diýip, HRI-niň işgäri Jeýs Tannell gürrüň berdi.
Uzynlygy bary-ýogy üç santimetre ýetýän molýuskalary çägäniň üstünde saýgarmak örän kyn. Şol sebäpli ýerli ýaşaýjylara juda seresap bolmak maslahat berilýär.
«Gök aždarha» ýa-da «gök perişde» (Glaucus atlanticus) aram we tropiki suwlarda ýaşaýan deňiz jandarydyr. Ol aşgazanyndaky gaz köpürjiginiň hasabyna suwuň ýüzünde saklanmagy başarýar.
Bu kiçijek ýyrtyjy zäherli sifonoforlar, esasan hem «portugal gämisi» bilen iýmitlenýär we özüni goramak üçin olaryň zäherli öýjüklerini özünde ýygnaýar. Şeýle iýmit tertibi sebäpli, molýuskanyň jansyz ýagdaýynda-da el degirmek örän agyryly bolup biler.
