Meşhur «The Pussycat Dolls» topary Nikol Şerzinger, Kimberli Waýatt we Eşli Robertsden ybarat trio görnüşinde gaýtadan sahna dolanýandyklaryny yglan etdiler. Bu dolanyş gyzlar toparynyň täze «Club Song» atly aýdymy we dünýä boýunça konsert syýahaty bilen utgaşdyrylar.
«Club Song» – toparyň 2020-nji ýyldaky «React» atly trekden soň çykaran ilkinji aýdymydyr. Eseriň prodýuseri Maýk Sabat, sözlerini bolsa Nikol Şerzinger norwegiýaly aýdymçy Kerolaýn Aýlin we koreýaly Solli bilen bilelikde ýazdy. Şeýle hem topar özüniň meşhur «PCD» we «Doll Domination» atly albomlaryny täzeden çykarar.
«PCD Forever» atly syýahatyň çäginde jemi 53 sany konsertiň bolmagyna garaşylýar. Käbir çykyşlarda gyzlara meşhur reperler Lil' Kim we Mýa hem goşular.
Ilkinji konsert 5-nji iýunda Kaliforniýada bolar. ABŞ-daky çykyşlar 1-nji awgustda Dallasda tamamlanar. Konsert syýahaty Ýewropa boýuça 9-njy sentýabrda Kopengagende başlap, 13-nji oktýabrda Londonda jemlener.
