Pink Floyd toparynyň meşhur sazandasy Dewid Gilmora degişli bolan «Fender Stratocaster» gitarasy Christie’s auksionynda rekord derejeli baha — 14,6 million dollara satyldy. Bu barada Rolling Stone neşiri habar berýär.
Satyjy öz adyny gizlin saklaýar. Bu uly söwda satuw başlanyna ýaňy bir 21 minut geçenden soň amala aşyryldy. Gitaranyň jemleýji bahasy garaşylýandan has ýokary boldy. Aslynda hünärmenler saz gurala 2–3 million dollar baha kesipdiler.
Bu söwdadan soň, Dewid Gilmoryň gitarasy dünýä taryhyndaky iň gymmat bahaly saz guraly diýlip ykrar edildi. Mundan öňki rekord Nirvana toparynyň aýdymçysy Kurt Kobeýniň 1959-njy ýylda çykarylan «Martin D-18E» akustik gitarasyna degişlidi. Gitara 2020-nji ýylda 6 million dollara satylypdy.
Gilmor özüniň meşhur «Fender Stratocaster» gitarasyny Pink Floyd toparynyň «The Dark Side of the Moon» (1973), «Wish You Were Here» (1975), «Animals» (1977), «The Wall» (1979) ýaly iň ýörgünli albomlarynyň ýazgylarynda ulandy. Şeýle-de bu saz guralynda aýratynlykda «Money», «Shine On You Crazy Diamond» aýdymlary we «Comfortably Numb» kompozisiýasynyň dünýä belli solosy ýazgy edildi.
Meşhur sazanda öz gitarasyny haýyr-sahawat maksady bilen satuwa çykardy. «Gitaralar meniň iň ýakyn dostlarymdy. Men mundan beýläk olaryň başgalara-da peýda bermegini isleýärin. Galyberse-de, Fender bu gitaranyň meňzeş nusgalaryny-da çykardy. Mende-de şolardan ýene iki-üç sany has gowy görnüşi bar. Kim bilýär, geljekde şol gitaralaryň biriniň reňkini üýtgedip, öz guralym edinäýmegimem ahmal» diýip, Gilmor oýny çyna garyp, gürrüň berýär.
