Garyşyk söweş sungaty boýunça russiýaly türgen Islam Mahaçewe «Dünýäde sambonyň ilçisi» diýen hormatly at berildi. Bu barada Halkara sambo federasiýasynyň (FIAS) metbugat gullugy habar berýär.
Dabara Moskwada, Lužnikidäki Halkara sambo merkezinde geçirildi. FIAS-yň prezidenti Wasiliý Şestakow türgene Mahaçewiň familiýasy we federasiýanyň nyşany bolan ýörite sambo kurtkasyny gowşurdy. Şeýle hem türgen ýene bir kurtka öz goluny goýup, ony FIAS-yň muzeýine sowgat berdi.
Wasiliý Şestakow Islam Mahaçewi 2026-njy ýylyň noýabr aýynda Samarkant şäherinde geçiriljek sambo boýunça ýubileý — 50-nji dünýä çempionatyna hormatly myhman hökmünde çagyrdy.
«Islam Mahaçew sambonyň dünýä sportunda nähili belent sepgitlere ýol açýandygynyň aýdyň nusgasydyr. Onuň sambo düşekçelerindäki ýeňişlerinden başlap, UFC çempiony derejesine çenli geçen ýoly bütin dünýäde millionlarça adamy ruhlandyrýar. Biz onuň sportuň bu görnüşini ýaýratmakda goşan goşandyna ýokary baha berýäris we buýsanç bilen «Dünýäde sambo ilçisi» diýen hormatly ady berýäris» – diýip, Wasiliý Şestakow belledi.
Häzirki wagtda Islam Mahaçew UFC-niň ýarym orta agramda çempionydyr. Mundan ozal ýeňil agramda hem çempion bolupdy. Şeýle hem Mahaçew söweş sambosy boýunça dünýä çempiony we Russiýanyň iki gezek çempiony boldy.
