«Inter Maýami» MLS-iň iň gymmat kluby boldy

«Forbes» amerikan žurnaly MLS klublarynyň gymmatlygy boýunça täzelenen sanawyny hödürledi. Sanawyň birinji ornuny bazardaky bahasy 1,35 mlrd dollara ýeten «Inter Maýami» eýeledi.
Klubuň meýdançadan daşary täjirçilik üstünliklerine Lionel Messiniň topara goşulmagy uly täsir etdi. Argentinaly hüjümçiniň gelmegi bilen Floridanyň bu topary petek satuwyny ep-esli artdyrdy, hemaýatkärler sanawyny giňeltdi we täze, girdejili iş ugurlaryny açdy.
Messiniň oýunçylar düzümine gelmegi bilen klubuň girdejileri tas dört esse artdy. Eger 2022-nji ýylda gazanç 56 mln dollar bolan bolsa, geçen möwsümiň jemi boýunça bu görkeziji 200 mln dollara çenli ýokarlandy. Geçen ýyl 38 ýaşly hüjümçi klub bilen şertnamasyny 2028-nji ýyl möwsüminiň ahyryna çenli uzaltdy. Girdejiniň mundan beýläk hem ýokarlanmagyna toparyň aprel aýynda açylmagy meýilleşdirilen 25 000 orunlyk täze «Maýami Fridom Park» stadionyna geçmegi hem ýardam eder.
Forbes-iň hasabyna görä, MLS-iň iň gymmat 10 kluby:

1. «Inter Maýami» — $1,35 mlrd;
2. «Los-Anjeles» — $1,32 mlrd;
3. «Los-Anjeles Gelaksi» — $1,08 mlrd;
4. «Nýu-Ýork Siti» — $1,02 mlrd;
5. «Atlanta Ýunaýted» — $1 mlrd;
6. «Sietl Saunders» — $860 mln;
7. «Ostin» — $855 mln;
8. «Kolambus Krýu» — $805 mln;
9. «Sinsinnati» — $800 mln;
10. «San-Diego» — $795 mln.