Messi «Barselonanyň» derwezesine gol geçirdi

8-nji fewralda Lionel Messi «Inter Maýami» bilen «Barselonanyň» arasynda geçirilen duşuşykda özüniň ajaýyp oýnuny görkezdi. Ol öz hasabyna bir gol we bir assist ýazdy.
Champions Tour — 2026-nyň çäklerinde geçirilen «Inter Maýami» bilen Ekwadoryň «Barselonasynyň» arasyndaky ýoldaşlyk oýny 2:2 hasabynda tamamlandy. Oýun Guaýakildäki «Monumental» stadionynda boldy.
Duşuşygyň 31-nji minutynda Messi garşydaş toparyň goragçylaryndan sypyp, çep aýagy bilen owadan gol girizdi we «Inter Maýami» üçin hasaby açdy.
Arakesmeden öň «Barselona» Žoao Rohasyň ýakyn aralykdan kelle bilen urmagy netijesinde hasaby deňledi. Emma birinji ýarymyň soňlanmagynyň edil öňýany Messiniň topy geçirmeginde German Berterame gol salyp, «Inter Maýamini» 2:1 hasabynda öňe çykardy.
Ikinji ýarymda toparlar birnäçe oýunçyny çalyşdy. «Inter Maýami» Messiniň deregine Luis Suaresi meýdança çykardy. Oýnuň ahyrynda «Barselona» hasaby deňlemegi başardy we duşuşyk 2:2 hasabynda tamamlandy.
Bu oýun täze möwsüme taýýarlygyň çäklerinde tälimçi Hawýer Maskerano we onuň oýunçylary üçin üçünji ýoldaşlyk duşuşygy boldy. Klub üçin birinji ýoldaşlyk oýny şowsuz tamamlandy: Peruwda «Alýansa Lima» toparyndan 0:3 hasabynda utuldy. Kolumbiýada bolsa topar «Atletiko Nasionaly» 2:1 hasabynda utdy.