«Indi beýle geýinme»: şu ýylky modanyň esasy antitrendleri

Moda yzygiderli üýtgeýär. Şu günki döwrebap hasaplan lybaslaryň ertir eýýäm antitrend hasaplanyp bilner. Şundan ugur alyp, Peopletalk neşiriniň bilermenleri  2026-njy ýylda modadan galjak birnäçe stillerdir biçüwler barada ýörite seljerme taýýarladylar.
Owersaýz. Uzyn we giň hudi, halta ýaly balaklar we hopul-sopul penjekler geçmişde galdy. Olaryň ýerini bili gysby biçüwler, dar jinsi balaklar, «Hedi Boys» estetikasyndan ugur alýan gyzlaryň hem oglanlaryň öz ölçegindäki žaketler we kurtkalar eýeleýär.

Sumkadaky «akyr-ukur». Soňky ýyllarda sumkalara dürli oýunjaklary, açarbaglary we asma bezegleri dakyp gezmek ýoň bolupdy, indi bu zatlar artykmaç hasaplanylýar. Bu ýyl sumka, diňe sumkalygyna galmaly.
«Clean Girl» estetikasy. Tekiz daralan saç we sypaýy makiýaž öz meşhurlygyny ýitirýär. Olaryň ýerini, bilermenleriň aýtmagyna görä, has erkin stil – goýberilen saçlar we parhsyzrak bezelen keşpler tutar.

«Nokat» nagyşlar. Geçen ýylyň meşhur nagşy bolan nokatly printler indi ähmiýetini ýitirdi. 2026-njy ýylda muňa derek öýjükli, zolakly ýa-da başgarak görnüşli nagyşlary saýlamak maslahat berilýär.
Sosial torlaryň mikrotrendleri. TikTok torunda işjeň ýaýradylýan boýuňyza, doglan ýylyňyza ýa-da beýleki ölçegleriňize görä lybas saýlamak hem antitrendlere degişli edildi. Bilermenler başgalaryň keşbini göçürmän, öz şahsy stiliňizi döretmegi maslahat berýärler.

2026-njy ýylyň modasynyň esasy ýörelgesi —çykan her trendiň yzyndan ylgamak däl-de, eýsem şahsy stiliňe we özboluşlylygyňa has uly üns bermekdir.