Urugwaýly hüjümçi Luis Suares Esasy futbol ligasynyň (MLS) «Inter Maýami» kluby bilen täze şertnama baglaşdy. Ylalaşyk 2026-njy ýylyň ahyryna çenli hereket edýär diýip, toparyň metbugat gullugy habar berdi.
38 ýaşly hüjümçi amerikan klubunda 2024-nji ýyldan bäri çykyş edýär. Bu döwürde ol 2024-nji ýylda MLS-iň yzygiderli çempionatynyň ýeňijisi titulyny gazandy we 2025-nji ýylda MLS Kubogynyň eýesi boldy. Futbolçynyň hasabynda ähli resmi ýaryşlarda 42 gol bolup, bu toparyň taryhynda Lionel Messiden (77 gol) soň ikinji görkezijidir.
Ozal Suares Urugwaýyň «Nasýonal», Braziliýanyň «Gremio», Niderlandlaryň «Aýaks» we «Groningen», Angliýanyň «Liwerpul», Ispaniýanyň «Barselona» we «Atletiko» klublarynda oýnady. Ol Niderlandlaryň çempiony, bäş gezek Ispaniýanyň çempiony bolup, dört gezek Ispaniýanyň Kubogyny, bir gezek Çempionlar ligasyny, UEFA-nyň Superkubogyny we Klublaýyn dünýä çempionatyny utdy.
Urugwaýyň milli ýygyndysynyň düzüminde Suares 143 oýna gatnaşyp, 69 gol geçirdi we 39 assist etdi. 2011-nji ýylda hüjümçi milli topar bilen Amerikanyň Kubogyny utdy.
